68歲嘅歌神許冠傑（Sam）寶刀未老，將於10月27-29日喺紅館舉行3場演唱會，搵咗陳凱彤、何傲兒、糖妹做Sam女郎，門票已經賣得八八九九，只係剩番27同28號少量$480飛。

日前阿Sam孖兩個囝囝拍短片「最後召集」，大家買飛要快手啦，因為阿Sam話絕不加場，錯過呢次機會，唔知要幾耐先再睇到歌神演唱會。阿Sam喺短片話：「今次我哋全家喺紅館同大家玩足一晚，包你夠皮，我已經定晒我嘅旅遊大計，騷完就起行，絕不加場，下次再喺香港同大家見，記得早啲買飛。」

之後佢仲自彈自唱幾句《學生哥》，俾大家止吓癮先，三父子一齊話：「We are ready，紅館見！」細仔懷谷打氣：「final call,final call」，大囝懷欣吶喊：「fighting fighting！」真係溫馨到爆。