屬鄉議會建制派的黃裕財，與社民連兒子黃浩銘，就像歡喜冤家。記者訪問財哥，阿銘即暗暗溫馨提示「老竇好很長氣」；財哥受訪時就不違言「同個仔有隔膜」。兩父子同場，要不相對無言，要不爭持不下，但一說到因替村民出頭，無辜被黑社會淋紅油恐嚇，瞬即歸位敵愾同仇。由被建制同袍問候「點教仔」，到寫信給獄中黃浩銘明言「以兒子為榮」，這個建制父親說：「個仔係硬骨頭嚟，比我堅強。」沒有鎂光燈下的深情擁抱，卻滿載「你出事我在旁」的承諾，港式地道的父子情深，有點麻甩，卻很窩心。

記者 呂麗嬋

面對東北案終審大限，下月便三十而立的黃浩銘謂心情緊張，但身為社民連副主席的他，還要忙於擺街站，參與籌備補選和土地大辯論，還得跟進服刑期間赤柱囚友的投訴。這天，難得留在家，只因痛風發作舉步為艱。「平時放工好夜，都係留飯入房食。」阿銘說。與父母同住，卻見面不多。父子一同受訪，不知誰先提起「做星還是做樹」，兩父子又爭辯起來：財哥堅持從政先要爭取做星才再做樹，阿銘就說寧願深耕細作先做好一棵樹，為人遮蔭。「佢(爸爸)係商人，我係農民，根本唔同。」阿銘總結。

為父者是務實派，擔心兒子「唔做星行先死先」，兒子堅持民主運動較追星重要。類似的各執一詞，過去10年，在黃家不時發生。在黃爸爸回憶中，衝突最嚴重一次，是2011年的「粟米斑腩飯」風波。「佢示威掟飯盒傷到當時特首曾蔭權，我個朋友係區議員，一打嚟就問候我老母：你識唔識教仔㗎？」當晚即時爆大鑊。「佢有同我解釋，爭取全民退休保障，不過已經火遮眼…」小時家中很窮，未做村長前，黃裕財做過搬運、小販，黃浩銘是老大，對下還有3個弟妹，父親是傳統的人，對長子期望特別高，「佢係好硬淨，可能同以前屋企窮有關，我讀書唔多，咁多年一直跑街，佢係屋企老大，幫手出去執頭執尾」。

「做得人老竇，辛苦供書教學，咁難得讀到大學，梗係想佢有份穩定職業，可以喺社會向上流」。理大社會系畢業，又在中大完成碩士，阿銘是家族中首個大學生，但也是首個入獄，財哥說很心傷。「（兒子）坐監也不怕，人前人後都不會流露悲怨，根本唔感覺到佢退縮，但我係老竇，喺佢背後反而忍唔住流眼淚」。上網追看衝擊立法會的影片，悲從中來：「佢係叫停啲矇面人唔好用暴力嗰個，但最終成為被告，坐監嘅係佢。」

在劍拔弩張的年代，不同陣營的人都要付上代價。年輕人賠上青春和前途，黃裕財也「因子之名」失去某些「朋友」，也失去部份地區委任議席。對此，黃爸爸欲言又止：「試過有人新官上任，半講笑同我講：唔好叫你個仔嚟搞我。」政治有多殘酷，無需太多政治智慧，大抵一樣能心領神會。但切肉不離皮，他還是緊張兒子前程多於自己。「我都半退休，有咩所謂？」財哥苦笑反問。

財哥向記者說了一個故事：他4年前因替寮屋村民出頭，被惡霸淋紅油致電威脅殺全家，兩個女被迫到親戚家暫住，兩個仔即時歸位，報警後買了8部閉路電視回家安裝，齊心對抗惡勢力。「因為呢件事我先明白，個仔點解會為新界東北受影響嘅村民出頭，我係村長尚且如此，其他人又如何？」深知改變不了硬頸兒子的人生選擇，他就跳出圍牆，嘗試了解兒子的世界。

「阿銘入獄嗰晚，3千幾人喺我facebook讚好同留言，鼓勵我加油，多謝我生咗一個咁嘅仔，為香港出力；仲有13+3大遊行嗰日，嗰個老師(韓連山)揸咪介紹黃浩銘係我個仔，好多人爭住同我握手，叫我堅強啲……」他開始明白，與自己有隔膜的「衰仔」，在他從來不熟悉的陣營，原來很得人心。他開始思考兒子口中「爭取雙普選係應有嘅嘢」或許不無道理。由猶豫到豁出去，步步為營卻又愈走愈前，包括以父親身份為兒子站台，遇市民批評拉布禍港，他這個建制派竟然代兒子解釋。

「市民唔理解，好多大白象工程如沙中線，問題係陸續浮現」。那些年，由被問候點樣教仔，到親筆寫信公開說「以兒子為榮」，同樣性格剛烈的父子倆仍然口硬，只是已「不再吓吓火星撞地球」，黃爸爸甚至不介意與長毛同枱食飯。在他眼中，因政見不同而受壓，是時勢下的宿命。「我始終覺得，國家要同年輕人和合」。但作為父親，他的願望很簡單：「除咗東北案終審，仲有佔中，希望佢判之前同未婚妻結咗婚，我就安樂晒。」