曼城前鋒阿古路上場聯賽大演帽子戲法後，生涯累積替球隊取得175個入波，只要多入三粒就可以成為隊史上入波最多嘅球員。藍月亮領隊哥迪奧拿似乎就心急過佢，想阿古路嗱嗱聲搞掂個紀錄。

對於阿古路嘅入球能力，哥迪奧拿自然係完全無懷疑，但佢仍然希望呢位阿根廷國腳可以喺球場上做多啲嘢：「前鋒唔止淨係要入波，有時候係要幫手壓逼對方防線，失咗控球權之後儘快搶番個波，我鍾意前鋒參與成個進攻過程，正如我唔鍾意中堅淨係負責防守一樣。」

講到阿古路爭兩個入波就會追平球隊名宿布祿克（Eric Brook）幫曼城射入177球、呢個由1939年起保持嘅紀錄，哥迪奧拿就有咁嘅睇法：「入波對阿古路嚟講就好似食生菜一樣，我可以講佢去到死果日都仲會入緊波，呢個係毫無疑問㗎！紀錄係要嚟打破嘅，喺邊度打破好？我唔知道呀。可能喺主場會好啲啩！」