家燕媽媽二仔石耀庭（Jackson）同太太Zoe嘅婚禮今日喺洲際酒店舉行。

家燕姐喺下午5點半又換咗一條金紅色晚裝，心情勁靚咁到咗會場，問到家燕姐送咗六隻金豬畀新抱，係咪想快啲抱孫，佢就話：「你哋周圍講，初初佢都唔明咩意思，不過我聽啲老人家講，一排豬會生好多，不過唔使生好多，一兩個就夠。」

問到珠寶行頭幾錢，家燕姐話：「我冇計，難得做奶奶靚吓啦，多謝六福送咗成套金杯金壼比我哋斟茶時用。」問佢金器同婚宴使唔使7位數，佢話：「唔知呀，我哋冇留意數字，最緊要靚。」新娘即賣口乖讚奶奶靚。家燕姐話佢前夫石保慶唔會嚟，但之後會食飯。

家燕姐同新抱會換5套衫，問到一對新人有關家燕姐想佢哋生一兩個，新娘就望住新郎話：「咁你努力啲啦。」新郎話自己會努力，目標係生一個先，但依家要努力工作專注事業。問送乜禮物比老婆，新郎話：「我送咗我自己比佢。」家燕姐大讚新抱係可人兒又得體又細心，係佢個仔嘅福氣。問新娘金器重唔重，佢話:「重㗎，我外國長大，未見過呢啲豬仔，覺得好得意。」家燕姐話好多朋友都請唔到，如果掛一漏萬就多多原諒。

問新郎Jackson婚禮使費幾多有冇7位數，Jackson話：「總之好靚個數字。」係咪媽咪比晒？佢話：「我都有付出，唔好講到我咁冇用。」至於有乜愛的宣言，新郎話：「我會好好照顧佢，努力同佢組織一個美好家庭，今日斟茶比媽咪最開心最感動。」

據知，過大禮嗰時，家燕姐送左家傳翡翠首飾畀新抱，有吊咀同耳環，由家燕姐婆婆傳到依家。

精選娛聞，喺晒《娛果》
http://fb.com/appledailyent