港鐵新任行政總裁韋達誠（JayWalder，圖）噚日履新，佢第一日返工就叫齊傳媒話要見見面。呢位來自美國嘅CEO一上場就賣花讚花香，話自己有成30年鐵路服務經驗，做過哈佛大學嘅講師，又做麥肯錫嘅合夥人，港鐵請佢實在物有所值。但八方日日搭港鐵，成日聽到咁多事故，真係覺得車費唔係咁物有所值囉。
韋達誠喺紐約市都會運輸局做CEO嗰陣，曾經有炒幾千人魷魚嘅紀錄。今次嚟到香港，佢話情況唔同晒，絕對唔會行番紐約嗰套，仲大讚港鐵係世界一流，又有可持續發展嘅財政實力。佢仲話咁快學埋港式管治文化，講到加價同加推優惠，即刻變身人肉錄音機，話票價只係按「可加可減」機制調整，港鐵又不時有優惠推廣，即係講完等於冇講。