肥佬黎呢期喺台灣好紅，出席完新書講座，又上TVBS。噚日佢上咗《101高峰會》節目，接受主持人李四端專訪。今次佢唔再講埋晒早幾日喺書展講嘅一蚊變五十億嘅創業神話嘞，反而講咗好多家庭嘢，有啲仲係鮮為人知㗎。
訪問中講到，肥佬黎個仔曾經喺校園俾人欺凌，於是乎佢決定以暴易暴，不過佢並冇幫個仔出頭，而係拖住個仔搵番欺負佢嘅同學，然後安排一場《我的野蠻同學》式嘅隻揪隻。結果係兩敗俱傷，做老竇嘅對結果好滿意，一方面個細路明白凡事要自己面對，另一方面佢同學冇再蝦佢。
肥佬黎話，佢好鍾意細路，所以58歲人講到最近添丁，開心到幾乎喊咗出嚟。唔好以為做肥佬黎個仔好幸福富貴，佢驚住啲仔做二世祖，所以堅持佢哋一定要出門自立。