鄭敬基（Joe）同太太Angie今日喺佐敦出席醫療設施代言活動，之前夫妻檔一齊拍廣告，Angie透露去年同Joe合作過一次，有咗經驗，今次比較輕鬆，問到夫妻檔上陣酬勞係咪好可觀？Joe話：「好多謝佢哋，覺得呢個廣告好適合我哋，太太都好注重健康，佢會自己種菜，又會自製洗頭水，搵我做白老鼠，呢排又整天然益生菌，可以降膽固醇。」佢哋仲話希望繼續夫妻檔工作，多啲拍攝有關健康資訊嘅工作。

提到Joe屋企被工作16年嘅印傭偷竊兼疑被落降頭一事，Joe話：「真係冇諗過有咁嘅經歷，經過今次真係『防傭之心不可無』，係有少少可惜。」Joe回想起幾年前有個溫哥華嘅朋友去咗佢屋企住嘅時候，唔見咗幾千蚊，佢話：「佢見到新聞先同我講，原來當年佢喺我度住時唔見咗幾千蚊，應該係我個工人偷，佢真係好兄弟，依家先出聲。」Angie亦話個印傭好狼，佢話：「一係唔攞，一攞就攞晒。」

而Joe嘅85歲媽咪都因為呢件事唔開心，仲搞到瞓唔到覺，Joe話：「為咗呢件事阿媽第一次去當舖，因為要贖返啲嘢，可能佢驚畀人認得，都未見過佢戴咁大副太陽眼鏡。」前幾日Joe媽媽已經去咗多倫多，Joe話：「等佢平復吓心情，唔使諗工人嘅嘢，佢已經話之後唔再請工人，我估計佢今次真係唔見咗唔少錢。」

精選娛聞，喺晒《娛果》 http://fb.com/appledailyent