財政預算案平淡如開水,冇開徵新稅同加稅,亦冇調整薪俸稅率,但就增加子女免稅額同供養父母或祖父母的歲數提前,有助減輕納稅人負擔。至於取消遺產稅同豁免離岸基金利得稅,則對促進投資及增強本港競爭力有正面作用。
滙控(005)同新地(016)除息,港股噚日早段曾一度低跌到13647,大跌169點,但低位有大盤吸納,中段之後行情已顯著回升,午後市勢轉穩,結果反跌為升,重以接近全日高位收市,恒指報13832,升15點,成交177億元,期指低水則大幅縮窄到57點。
大市低開高收,其實計入滙控同新地除息嘅因素,噚日恒指都升咗成百點,50日線(13789)同100日線(13798)支持失而復得。大市應跌不跌,爭持好激烈。
其實,市場普遍認為大市冇上升動力,因此,在現水平,看淡者始終佔多數。實際上,利淡消息充斥,息口趨升已可嚇窒投資者,而淡友一貫「穩勝」的「抽資」伎倆,亦繼續發揮效用(噚日金管局又再接下1.48億港元,令銀行體系結餘進一步下降至47.48億港元),加上特首任期政治爭拗等因素,大市實在易跌難升。
不過,睇近期個別股票嘅表現,大戶似乎並冇看淡後市。就以噚日為例,好多大藍籌,例如中移動(941)同新地等,都見到大行好主動掃貨,個別認股證嘅表現更明顯轉強。
同芬佬傾開,佢哋話短期都會係上落市,個人認為大戶係正在收緊貨,但唔會畀個市升住;每當大市去到高位,就出招(例如「抽資」)將佢㩒低,而落番低位時就買貨,睇嚟呢個窄幅上落期(13500至14300之間)重會維持一段幾長嘅時間,等大戶收集完成,大市才會飆升。
中科技料有後着
中國科技(2964)連續第4日上升,噚日收31.5仙,升2仙,升幅6.7%。
中科技過去兩個月先後兩次配股,籌集逾2億元資金,傳增持石家莊雙環汽車至50%權益的洽商已到最後階段,好快會有好消息。
雙環汽車去年產量逾1萬部,獲利2億元人民幣,今年目標產量係2.5萬部,盈利將會大增。
郭兆誠