侍仔:佢點樣裝修我就唔知,不過我自己就要幫埋手囉!執枱又係我,天花執漏都係我,真係有冇搞錯!
招積域:算數啦侍仔,能者多勞,做多啲冇壞嘅,最多我去完東歐旅行之後醒啲料過你啦!我呢個職業賭徒,經過失意嘅世界盃後,要反思一下投注策略。
菠蘿文:見馬會個網又有日職、北歐波同巴甲賭,呢啲波係咪咁好賭㗎招積域?
招積域:我就專注4大聯賽,嗰啲偏門嘅就唔玩喇,得閒睇吓就算,費事又蝕畀馬會啦,倒不如趁空檔唞吓好過。
肥牛:留意吓轉會消息好過啦,賭波都要睇埋軍情嘅,咪淨係睇數目字咁簡單。
招積域:咁數目字都有佢代表性嘅,好似意大利射12碼咁樣,決賽射5球全部入晒,你之後睇意大利射12碼都定啲啦。
菠蘿文:世界盃完咗,個人好似若有所失,要變番正常時間作息。睇報紙話通宵睇波,會有乜嘢顛倒睡眠症喎。我𠵱家記性差咗咁多,會唔會有事㗎?
侍仔:你休息一吓就冇事啦,𠵱家個個都做到成隻嘢咁,有時覺得自己冇病痛係咪等於唔勤力做嘢?
招積域:每個人身體質素都唔同,無病是福。
文:高洛文