梁齊昕今日凌晨怒摑阿媽兩巴掌，全程哄動，究竟成件事係點發生，o依家同大家回帶直擊。

夜晚12點幾，扮到成隻厲鬼嘅齊昕喺中環歷山大廈嘅夜店Armani/Privé單拖離去，當時佢心情好好，見到記者仲問：「我個妝靚唔靚？化咗個半鐘。」記者問有冇叫媽咪扮哈囉喂？齊昕抵死話：「叫咗佢扮龍蝦。」問齊昕隻腳好番未？貪靚嘅佢話：「都要着高踭鞋。」

之後齊昕行去地面想截的士，點知好多的士都冚旗，齊昕嬲爆爆鬧：「係咪拒截？」由於當時有近十位記者採訪，吸引好多途人影相，但途人都未必知呢個係齊昕，之後齊昕打電話call車，不過15分鐘終於截到的士，佢坐的士去雲咸街夜店，由於沿途好塞車，齊昕就落車喺馬路行，有女警即刻上前勸止，叫齊昕：「行番上行人路。」記者話呢個係梁齊昕！女警就扶住佢行馬路，之後齊昕去到夜店BUNGALOW，有男友人一早喺門口等佢入場，齊昕見記者影佢朋友就反應好激動，衝埋嚟鬧記者：「唔好影我朋友。」

之後齊昕出嚟再截的士時，佢嘅男友人就出現，佢哋仲試圖搶男記者嘅DV，男記者退後避幾乎跌地，DV有少少損毀，之後佢哋就入咗一間餐廳。