唐文龍、韓君婷、陳嘉桓、顏仟汶同楊玉梅等，今日喺深圳出席電影發佈活動，曾經同佘詩曼傳緋聞嘅唐文龍，講起之前Chilam宣傳電影《十月初五的月光》時話想撮合佢哋，唐文龍話：「唔好玩啦！佢都冇解，自己結咗婚，有冇理人感受。我哋係好兄弟、好朋友，佢係好女仔、好靚女，我哋冇可能。」

兩個都單身點解冇可能？唐文龍話：「我哋識咗10幾年唔會啦。」見面會唔會尷尬？佢話：「好朋友點會尷尬？佢大把人追。」咁票房好會唔會全裸謝票？佢就話：「講啫，叫佢上月球就上到咩？講呢啲。」

好耐冇見嘅顏仟汶早年喺香港開餐廳，笑言0依家主力做歌女賣唱，佢仲話自己戲癮起，好想拍返戲，仲話自己咁嘅年紀，就算做呀媽都唔會介意，講到好姊妹林雅詩婚變情傷自殘一事，仟汶話：「發生咁嘅事一定唔開心，係人生挫折，現階段同佢講要愛錫自己，我叫佢應承我唔好再做傻事，放開一段感情未嘗唔係好事，緣份到咗，放生大家，放手最重要。」

同場嘅陳嘉桓就話希望嚐試拍下喜劇、巴渣同發癲嘅角色，講到合作，Rose就話由細到大都好鍾意鄭秀文，除咗音樂，佢都好鍾意Sammi演嘅喜劇，至於想同邊個男演員合作？Rose就話：「發哥係香港娛樂圈嘅開心icon，好有標誌性，我都好想喺街捕獲發哥，要去多啲九龍城。」