由孔劉、馬東錫、鄭有美等主演嘅韓國首部災難喪屍電影《屍殺列車》，上月喺韓國上映，上映19日即成為今年首齣觀眾入場人次過千萬嘅韓片，認真厲害。

噚日《屍殺列車》終於喺香港正式公映，之前優先場《屍殺》已場場爆滿，到噚日開畫，單日票房即突破2百萬，噚日開畫收$2,510,164港元，觀眾入場人次達36,291人，累積票房更超過6百萬，收$6,496,784港元。

噚日開畫嘅《屍殺列車》入場人次已破咗同樣講喪屍、由畢彼特（Brad Pitt）主演於2013年上映嘅荷李活電影《地球末日戰》（World War Z），當時《地球末日戰》嘅開畫觀眾入場人次有34,520人。

另外，孔劉今晚現身首爾松坡區，出席跟影帝宋康昊及韓智敏合作嘅新片《密探》首映禮，孔劉近期憑《屍殺列車》上位，佢一現身粉絲即陷入瘋狂，而孔劉亦識做地又送抱又自拍。