馮仁昭四圍超：寸爆警方認人
明哥口罩黨揀同志 - 馮仁昭

蘋果日報 2015/06/02 00:00

人民力量嘅陳志全（慢必）日前乘搭港鐵，俾兩男一女瘋狂辱罵，又以佢嘅性向作人身攻擊，令性傾向歧視問題再受關注。快將53歲嘅黃耀明，大前年喺紅館舞台大方承認出櫃，又積極參與爭取同志平權活動。早前明哥應now102觀星台嘅邀請，擔任今個星期四播第一集嘅《攣直後援會2》嘉賓，希望透過節目內容，消除大家對同性戀者嘅誤解。
empty
黃耀明要喺戴口罩同浴帽嘅男士中揀「攣男」，明寸警方早前認人程序嘅「安排」。
請嘉賓遇困難
節目首集更寸盡警方，模仿佢哋安排採訪「雨傘運動」被襲嘅記者認人時，要喺戴口罩同埋浴帽嘅人堆入面，分辨邊個係疑犯，兩位主持梁梓禧（前名：梁奕倫）同茜利妹要明哥只係靠眼望，喺3個戴咗口罩同浴帽嘅男士入面揀出邊個係「攣男」，當然明哥最後認人失敗，要喺發問環節先成功揀中。
梁梓禧透露，節目前年播第一輯收視幾好，所以公司先決定開第二輯，但佢就大嘆聯絡嘉賓頗困難。佢話：「之後仲會有邵仲衡、艾威、邵音音、黃芷晴同姜麗文等上嚟節目，但𠵱家搵嘉賓真係好難，唔知係啲藝人保守定係其他原因，好多人都好似唔敢接觸呢個話題，仲慘過叫佢哋講自己係黃絲帶定藍絲帶咁，真係好奇怪。」
採訪：小米
撰文：馮仁昭
empty
黃耀明最後要向3位男士提問，先成功選出邊個係同志。