抗疫後知後覺嘅777，推出政策措施反應慢幾拍，前日仲懶係眾人皆醉我獨醒，拋出一個震驚700萬人嘅「禁酒令」，理由係市民「飲醉少少會有更親密行為，增加交叉感染風險」，八方聽完真係嚇一跳，然後得啖笑，因為親密行為同飲醉少少之間，本來就冇絕對關係，甚至邊個係因邊個係果都有待商榷，但肯定嘅只係禁酒客觀效果唔見得對抗疫會有乜嘢大幫助。不過好多網民聽完777呢番說話，即刻產生無限聯想，仲好可憐777嘅另一半「林手足」，推測呢個可能係佢嘅人生黑歷史。

十．一酒會　777同王志民碰杯

之前777每次開完抗疫記招都會巧合引發搶購潮，前日講完禁酒，唔少網民都擔心要撲定酒精類飲品做存貨。佢講到疫情之下酒精好似會害人，大家就紛紛翻舊賬，發現佢成日公開飲酒，八方想知佢有冇飲到少少醉，而又真係同啲「酒伴」發生更親密行為？

其中香港眾志黃之鋒仲特別貼出多張777嘅飲酒相，包括喺十．一酒會777同689仲有阿董一齊碰杯，仲笑到見牙唔見眼，同台仲有俾人燉咗冬菇嘅時任中聯辦主任王志民，之後佢哋有冇發生「行埋一齊」呢個更親密行為，大家應該都有目共睹啦，難怪之鋒都留言話：「睇番國慶酒會，林鄭飲酒飲得好開心嘅相，我忽然明白了甚麼。」

李八方