民望包尾嘅財經事務及庫務局局長馬時亨,噚日同兩個副手常秘黎年同副秘書長區璟智一齊同記者開聖誕茶敍會。
馬時亨坐低後,就大聲叫兩個下屬歸位,坐埋佢旁邊一齊答記者問題。
「乜水都俾我吸晒」
由於人多擠迫,馬時亨連叫幾聲「璟智」、「璟智」,區璟智先埋到佢身邊,唔知係咪唔慣被老闆嗌得咁親暱,區璟智一個分心,唔小心打爛咗茶几上隻水杯,場面幾混亂。
大家手忙腳亂,坐喺旁邊嘅黎年,第一個反應夠晒直接,「要charge番佢cost」。言下之意要區璟智賠番隻杯畀政府。
一隻水杯值幾多錢吖,黎年都係講笑啫,但可見政府部門𠵱家真係乜都講錢,時刻計住數。黎年負責庫務,即係睇住政府盤數。有咁大反應,都算正常。
打爛杯嘅區璟智尷尬地笑咗一笑,都係馬時亨醒目,即刻開聲兜番,話水為財,啱晒佢個局;更絕嘅係馬時亨一路搵紙巾抹地,一路講笑話:「乜水都俾我吸晒!」局長講到出口咁恨「吸水」,有乜微言大意呢?
傳真︰2623-9278
電郵︰[email protected]