剛宣佈快做龍爸爸嘅劉德華，認真人逢喜事，日前同張靜初、林志玲等去到全球最豪華、耗資15億美元（約116億港元）建成嘅杜拜棕櫚島亞特蘭蒂斯酒店為新片《富春山居圖》開發佈會，認真夠派頭！華仔被問到生活上有乜嘢重大改變？佢話：「冇乜，私人生活同工作係分開。」
華仔部新片被喻為係東方諜戰片，難免會畀人同《007》或《職業特工隊：鬼影約章》作比較，導演孫健君講笑話華仔喺佢哋心目中，前30年係湯告魯斯同米高積遜嘅結合，後30年就係辛康納利。不過華仔唔多認同：「我更希望我係我自己。我唔知道呢部片可唔可以同外國人比較，但我哋會做到一個非常非常特別、獨有嘅諜戰片。」

張靜初如在夢境

呢個人工島度乜嘢都係超級豪華，難怪張靜初讚不絕口，佢以流利英語話：「非常像一個夢，看到非常漂亮的波斯灣，覺得只有坐着飛毯才能來到。我很期待這次拍攝，我將要開一輛車，還要被拉到空中，可看到杜拜很漂亮的風景，我們知道一千零一夜的故事，我們相信這將是1002夜02日的故事，我非常期待帶給中國的觀眾。」北京同杜拜嘅溫差好大，林志玲到埗已覺得身體唔舒服，未有致詞，但全程微笑。