【拆局】
九西立會補選下月開始提名，被視為建制派代表的陳凱欣突傳出不再做建制的「健康大使」，政界有人認為陳準備「洗底」報名參選、也有傳是建制調整宣傳策略。民主派人士認為兩個說法也有可能，他們均認為與民建聯鄭泳舜出戰九西補選作比較，陳今次宣傳策略明顯較差，且產生不少負面效果，即使現在叫停洗底，恐怕也不易補鑊。

「滅蚊過晒氣」

有曾參與上次九西補選的民主派人士指，鄭泳舜在地區有一定知名度，故民建聯以陣地戰形式為鄭落區拉票，「一方面穩固建制派自己鐵票、另一方面吸收街坊票」，而事實亦證明有關策略適合鄭。但該民主派人士直言，今次建制為陳催谷知名度策略，「好似冇諗過啱唔啱陳凱欣咁，總之不斷大灑金錢，完全突出唔到佢有乜優點」，而且整個宣傳更令人有偷步拉票之嫌。他坦言即使陳現在「斬纜」不做「健康大使」，「市民唔會因為佢（陳凱欣）唔做健康大使，就唔記得建制為佢大灑金錢，只會更認定係偷步拉票」。
另一民主派中人指，建制派及陳凱欣之前大搞滅蚊，相信他們想避開高鐵、沙中綫豆腐渣工程等敏感議題，「但𠵱家滅蚊過晒氣，如果陳凱欣要改變策略，佢打唔打沙中綫豆腐渣工程？咁唔單止要打政府，隨時連之前保過港鐵嘅建制派都要打埋」。
■記者莫劍弦