兩個都係上季俾人捧上天嘅後起之秀,列斯前鋒米拿嘅發展同愛華頓新星朗尼比較,可以話差天共地。正當朗尼喺國家隊挑戰幾個師兄嘅正選位置時,突然傳來列斯外借米拿去英乙聯球會史雲頓,為期一個月。
列斯今夏招攬好幾個短期僱傭兵幫助護級,誓估唔到竟將被公認為未來希望嘅米拿外借,呢個舉動都咪話唔令人費解。再講,我求大俠覺得一係唔借,決定借就索性借長啲,一個月時間喎,米拿仔去到新球會需時適應,啱啱坐暖個位之後又即刻要回巢,好難達到學習效果喎。到底列斯會方諗緊咩呢?
巴塞隆拿白養球員搵氣嚟激
歐洲大會同啲球員合約不嬲都立立亂,話說巴塞一直想同兩個球員門將保蘭奴及前鋒丹尼解約,所以今屆已經冇同佢哋註冊,但係佢哋竟然賴死唔走,搞到巴塞冇晒符。我求大俠就話,兩位仁兄不如走吧啦,咁大個人有番啲骨氣好,東家唔打打西家,況且佢哋都係有料之人!
李華度話喺AC好冇癮
李華度喺AC米蘭發展唔如意,平時對意國傳媒最多都係講啲行貨說話。正所謂鬱咗咁耐,返到南美地頭重唔暢所欲言咩。日前佢就向巴西傳媒大吐苦水,話AC教練安察洛堤唔信任佢,令佢好冇癮。AC會方喺巴西咁多線,李華度小心被秋後算帳喎。