小妹認識唔少台灣人每年都會去韓國旅行，朋友話去到首爾最好住喺明洞附近，方便行街買嘢，可考慮入住旅館或者民宿，首推喺明洞購物區步行唔使10分鐘嘅SeoulTowerVille，好多中港台遊客入住，負責人係一個看似非常嚴肅，實際上極之親切細心嘅伯伯。
旅館每間房都有客廳、廚房、廁所、洗衣機同露台，好彩嘅話住正間房可望到著名旅遊景點南山塔同明洞區，缺點係要行段斜路同樓梯。單人房每晚45,000韓圜（約301港元），兩人以上每人一晚28,000韓圜（約187港元），最大間房可住12人，6人以上有兩個洗手間，網站查詢 http://www.stville.com/。
當地滑雪團要小心選擇，朋友推介 http://www.kgood.net/

滑雪團。即日來回滑雪團朝早8點出車，傍晚6點返到集合地點。每位收費最貴12萬韓圜（約803港元），越多人報名越平，20人以上只需78,000韓圜（約522港元）。費用已包旅遊巴接送，滑雪場入場費、滑雪手套、滑雪服，同埋最重要30分鐘滑雪課程，回程時仲有下午茶。教練同領隊都識講普通話，唔怕雞同鴨講。

電郵：mailto:[email protected]