韋斯卜克（Russell Westbrook）以2.05億美元（約16億港元）續約雷霆五年，而球隊管理層下個任務，相信就係說服明夏會變成自由身嘅保羅佐治（Paul George）同安東尼（Carmelo Anthony）留低；不過雷霆要保住「三巨頭」，就好大機會成為NBA史上首隊單季支出總額（即球員薪水加奢侈稅）達三億美元（約23.5億港元）嘅球隊！

韋少嘅新合同將於2018/19球季生效，如果PG和Melo喺明夏決定執行球員選項留隊，咁雷霆喺2018/19賽季嘅受保障薪金總額就會高達1.38億美元（約11.8億港元），而該球季嘅預計薪酬上限同奢侈稅線分別係1.10億美元（約8.6億港元）同1.25億美元（約9.8億港元），咁意味雷霆將需支付巨額奢侈稅。