當年今日
關於我們

Sammi健身教練畀貼士常做運動自然靚

蘋果日報 2003/06/24 08:00


自小已極之好動,尤其鍾情籃球的Sunny,在大學畢業前與數名同學一起報讀健身教練課程,其後更當了全職健身教練,之後獲朋友介紹當模特兒,開始雙線發展個人事業;不過,他從未放棄運動,總之一有時間就做運動,年前更曾效力甲一組籃球球會青年,可說真真正正的「運動型男」。

常做運動人自然靚
身高六呎二吋的Sunny說,模特兒工作絕對不容許「肥」,而讀過健身教練課程令自己知道如何才可以長時間保持至Fit狀態:「對我嚟講,健身及模特兒呢兩方面嘅工作可以話係相輔相成,從健身課程裏面所學到嘅知識,令我知道乜嘢應該做,乜嘢唔應該做。做運動首要目的係要令到身體更加健康,其次就係為咗『靚』,當個人經常處於良好狀態,畀人或者自己嘅感覺自然會『靚』啲。」
一有空即去打波或做Gym的他說,對一般人而言,每星期抽到三日,每次做三十至四十五分鐘運動,基本上可達致一個健康的水平;如有時間可以再做些重量訓練,因為這樣可令到肌肉結實啲,同身體嘅Figure亦好睇啲。

注意飲食運動消脂
他說:「好多人出了社會工作,因為工作繁忙,自然地做少咗運動,但個人飲食習慣又維持不變,久而久之就會變肥。舉個例講,香港嘅碟頭飯(或飯盒)通常裝到滿晒,其實女士食一半已夠,只係大家習慣咗呢個食量,好隨便可以食晒,其實係咪需要咁多呢?所以要健康,除運動外,平時飲食要好小心。」
經常出Show及拍硬照的Sunny說,除了常做運動以及注意飲食外,男士們要靚得有型,還有些小節需要留意,他說:「男士頭油較多,易脫髮,所以揀洗頭水要揀啲冇咁油嘅;另外要經常保持面部清潔,如常用清水洗臉或用濕紙巾抹臉。」
注意飲食運動消脂
健身:3-4次,每次2小時
跑步:5次,每次45分鐘
游水:1-2次,每次1-2小時
籃球:3次,每次3-5小時
健身小貼士:「好多男士做健身都比較集中做上身,但係咁樣好容易會出現肌肉發展唔平均嘅情況,所以健身時唔好只集中於某一兩個部位嘅肌肉;例如做上身之餘,都要做些腳部嘅鍛煉,咁就可以避免香雞腳嘅情況。」

飲食篇
早餐:麵包、朱古力奶
午餐:雞胸肉飯
下午茶:多士、凍檸茶
晚餐:菜、肉或魚、 小量飯
飲食小貼士:「小食多餐,每餐不用食得太多,有飽嘅感覺已經可以,而一日最多可食到五餐都冇問題。生果及菜,當然不可缺少,而中國人一般習慣將菜煮熟才食,而維他命係水溶性,菜經煮後,會流失好多嘅維他命;反而外國人一般都比較鍾意食沙律同生菜,咁樣會吸收多啲維他命。」

Sunny小檔案
出生日期:2月2日
身高:1米86
體重:75公斤
現職:模特兒、健身教練
嗜好運動:籃球、排球、游水及滑浪
曾拍廣告:Head&Shoulders及Sunday等