講起汪明荃(阿姐)、黃淑儀同趙雅芝，除咗會諗起佢哋係無綫第一代嘅四大花旦外，相信大家都會記得阿姐曾先後同黃淑儀同趙雅芝傳出不和，但噚晚佢哋為咗一個男人，竟然喺將軍澳電視城重聚。呢個男人就係鄭少秋(秋官)喇！

即將開演唱會嘅秋官，噚晚特登返大台錄影《群星唱談鄭少秋》節目，請咗昔日拍擋同好友做嘉賓，包括汪明荃、趙雅芝、黃淑儀、米雪、商天娥、劉美娟、張天愛、吳岱融同「蟹仔」陶大宇等人做嘉賓，喺第一代大台劇集《倚天屠龍記》同《書劍恩仇錄》嘅年代，就傳過阿姐先後同趙雅芝同黃淑儀不和，當年仲講到阿姐用劍刺傷黃淑儀額頭，但噚晚呢三位「美魔女」就齊齊去到電視城為秋官嘅節目錄影，錄影前佢哋仲同米雪、商天娥同劉美娟影咗張世紀大合照㖭！

能夠請到咁多好友嚟錄影，秋官笑言話為咗呢個節目欠下一身人情債，講到囡囡欣宜未能為佢嘅演唱會做嘉賓，秋官就話好可惜，但欣宜有工作在身都冇辦法。至於陶大宇自薦做嘉賓被掟落台，秋官就笑住話要將舞台搭高啲。

另外，阿姐就話自己都籌備緊演唱會，仲話會唱番唔少經典金曲，例如《熱咖啡》等，而老公羅家英亦會參與其中。

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。