台灣歌手潘瑋柏早前因為出演大陸人氣綜藝節目《中國有嘻哈》而人氣急升，佢日前推出新專輯《illi 異類》中嘅新歌《失眠》就被爆抄襲韓國男團Highlight成員龍俊亨嘅歌曲。由於《失眠》由潘瑋柏同房振剛共同創作，房振剛及後亦發咗道歉聲明認有抄襲，潘瑋柏所屬嘅華納亦表示會將歌曲下架(相關新聞連結： http://bit.ly/2wPsemD），事件令到潘瑋柏冒上抄歌之嫌。

點知近日潘瑋柏再推出新歌《啞巴》又再陷抄歌疑雲，台灣音樂人麻吉弟弟今晚喺Facebook上載短片質疑潘瑋柏《啞巴》涉嫌抄襲韓國天團BIGBANG成員太陽嘅名曲《EYES, NOSE, LIPS 》，更特別將兩首歌串連起來等大家評論，又說：「潘瑋柏又抄襲歌？你們聽聽自己決定！」並叫網民可以留言評論，當中兩首歌重叠在一起如融為一體，分開聽會覺得個唱法同編曲都好似。