J.Arie今日喺商台為本月21日推出嘅新碟進行宣傳，佢透露碟中嘅9首作品，都係想帶出人與人之間嘅關係，對社會多份關注，然後用聲音唱出嚟。J.Arie表示稍後會喺銅鑼灣AppleStore舉行新碟發佈會，屆時會演繹9首新歌。

對於有傳吳雨霏過檔佢所屬嘅公司，成為Paco旗下藝人？J.Arie話：「係咩﹖我唔知呀，第一次聽到呢個消息，都好呀，我不嬲都好鍾意佢把聲音。」

擔唔擔心資源被分薄﹖J.Arie笑住話：「唔好講呢啲啦，唔會嘅，公司對個個都非常之好，我入行之後好想做音樂，公司一直都非常支持我，Paco好放心畀我做。」