深圳上市嘅酒企瀘州老窖，喺舊年10月宣佈，擺喺農行嘅1.5億元（人民幣．下同）定期存款不翼而飛。呢單嘢已經夠晒離奇，公司上禮拜五公佈，擺喺工行嘅3.5億元又唔見咗，前後唔見5億元。
一間上市公司不斷被人咁樣穿櫃桶底，股民仲點可以有信心，股價尋日又跌停板。
上市公司嘅銀行存款不斷失蹤，簡直匪夷所思。有業內人士分析，原因係公司職員以公司錢買高息理財產品，通常涉及大量枱底交易。
一旦有事，銀行就唔認數，結果要股東找數。問題係，咁嘅漏洞已經發生過，上次出事後，點解冇作補救？
資產離奇失蹤，舊年仲有一單，就係同樣深圳上市嘅獐子島，喺公佈業績前夕，突然宣佈公司主要資產，價值8億元嘅扇貝，已經全部死晒，股民欲哭無淚。
呢類嘅事件，少喺滬股發生，因為上海股市主要係國企同大型嘅公司，深圳股市股份主要為民企同中小公司。
瀘州老窖同獐子島都喺主板上市，如果深港通開咗，多數會被列入合資格名單。事件提醒股民，第日買深港通股份，一定要更加小心。

李可強