當年今日
關於我們

校長兇過狼 - 陳也

蘋果日報 2019/03/12 02:20

l012頂級頂肺陳也東華三院屎忽鬼黑社會刮友老師跳樓羅校長

天水圍東華三院名下一間小學,老師校內跳樓以死控訴校長惡行(惡行唔係拍吓門咁小兒科啊)!羅姓女校長一夜成名,校內老師轉述校長金句,與「黑社會刮友」一樣令人震驚。

校長確係人才,最啱做官!冇呃人的,單是她那句時常用來「大」下屬的神句就跟林鄭有得鍊!「我好中意做嘢!」老師因病告假,羅校長一句頂埋去:「我呢就唔會俾自己病!」試諗吓,由羅校長做食衞局長那份工,日日鬧市民:「我呢就唔會俾人病!」市民病,唔到佢唔俾,羅校長就向做到吊頸都唔得閒的醫護發炮:「壓力爆煲?你冇能力handle,專登做差件事,博下年唔使做呢啲嘢。」羅校長唔收口,鬧埋醫管局那些薪酬高過特首的高層:「你咁高人工,嘢又做唔到,我隨時可以請其他人代替你。」別以為教育局高高在上,羅校長會口窒,楊局長照抦:「你時間觀念唔好,又冇計劃,呢一行唔適合你!」港鐵與運房局那幾位混蛋遇着羅校長,灰頭土臉被罵到PK,還要寫悔過書,「明天擺喺我枱頭!」羅校長鬧老師紅了,會跳槽去理大做校長嗎?逼死老師,她眼都唔眨一下,對港獨,絕對殺無赦!羅校長是不是屎忽鬼冇人知,兇狠過狼則顯而易見,西環like爆,選硬特首。