巴黎聖日耳門（PSG）前鋒尼馬近排同隊友卡雲尼爆出爭射罰球同12碼嘅風波，有傳佢向一班隊友道咗歉，亦都有指教練艾馬利落咗「柯打」以後點處理同類事件。不過，PSG禮拜六喺法甲作客蒙彼利埃場波，大軍名單就無尼馬個名。

巴黎聖日耳門無解釋點解尼馬缺陣，但係多個法國傳媒就話呢位巴西國腳有輕傷，所以PSG寧願唔搏，但就相信佢喺下周中主場鬥拜仁慕尼黑嘅歐聯分組賽係可以上陣。尼馬自己喺今個禮拜初亦post咗相喺Instagram，當時佢祝隊友兼同鄉堤亞高施華生日快樂，的確見到尼馬係包住隻腳趾公嘅。PSG今場仲肯定有迪馬利亞同埋柏斯托尼分別因為大腿、小腿有傷缺陣。

巴黎聖日耳門開季六場聯賽全部贏波，入咗21球，只係失咗三球。