60歲嘅英國男星丹尼爾路易斯（Daniel Day-Lewis）係出名嘅實力演技派，更係史上唯一一個三奪奧斯卡影帝殊榮嘅男演員，不過今年6月底嘅時候，佢透過發言人宣佈退休息影，仲冇公開說明過原因，令觀眾大感惋惜。不過佢退休唔夠3個月，就被人影到佢整斷手打住石膏，仲剃光咗頭，一臉痛苦現身街頭，令人擔心。

據媒體《Page Six》報導，影帝丹尼爾路易斯於週三被影到佢喺紐約街頭現身，但同以往西裝骨骨嘅紳士形象好唔同，佢着住一身家居服，頭髮全部剃晒，左手打住石膏，右手貼住棉花，仲戴住醫院嘅手帶，睇嚟受傷都唔輕。有關人士透露佢係因為炒電單車而整斷手：「佢冇乜事，冇其他人受傷，而他都有戴頭盔所以冇大礙，只係睇上去嚇親人。」又話呢單事故「唔係丹尼爾路易斯嘅錯」，只係純屬意外咁話。