當年今日
關於我們

【我的置業故事】90後斥4球買港島164呎劏房 「未試過擁有自己一間房」

蘋果日報 2020/05/22 00:00

劏房One Eighty蘋果驗樓

90後Charles以前做獵頭公司,現在轉去大公司做HR,工作6年儲到約80萬元首期買樓。保險經紀?地產經紀?總有一個舊同學做一瓣,而他被做地產經紀、視如兄弟的中學同學游說買樓。

去年11月以394萬元買入筲箕灣One Eighty一個164方呎劏房,咁細都買?他坦言少少後悔,強調絕非因經紀老友,而是同等價值在新界九龍可以買大好多,但初心是買樓買location,樓盤在港島,劏房也是房,況且「咁大個仔都未試過擁有自己一間房」,更何況「女友係非常願意同我食麥記」,視劏房為上車踏腳石。

2017年發展商林氏家族代表委託美聯搞首場記招,樓盤未改名,先透露祖上乃香港著名建築商林護。90後同事問林護是誰?Google答,除了學校,有本書名為《林護:孫中山背後的香港建築商》。翌年才第二次記招,林昍話單位面積大極有限。結果真係好老實,全幢57伙,一梯3伙,面積分別164、247及253方呎。

Charles話:「買之前做過少少資料搜集,呢個林氏家族都幾耐歷史,興建過醫院、學校,係老牌建築商,我信得過……當時賣樓花,連示範單位都無睇過,純粹睇圖則,主要因為location,同埋有個朋友推介。買都買得好倉卒,諗咗一個禮拜就去排隊,因為未知抽唔抽到,點知抽中前籌就揀咗中層單位。」他支付兩成首期約80萬元,以394萬元購入實用面積164方呎的開放式單位。

買完嗰下,「開心!終於置業,可以搬出嚟住。我2014年畢業開始做嘢,之前做獵頭公司有佣金,而家做某公司內部人力資源,收入比之前穩定,供樓唔會太大壓力。其實買嗰陣都擔心樓價跌,因為買嗰時係上年11月,就係當時社運比較激烈,屋企人都有擔心過問:『點解你揀呢個時候入市?』但我最想買港島樓,要喺港島區買新樓,自己又負擔得到,嗰段時間就係得呢度,同埋當時我都係諗自住,就算賣出都係3年後嘅事,我又無將投資擺喺優先決定,就買咗!」

他口中的「朋友推介」,實情是從事地產經紀的中學同學,不諱言總有一個舊同學做經紀,「咁啱我嘅中學同學之中,有地產又有保險,而做地產呢個係我兄弟。(有無覺得自己落沓?)唔算,因為我幾鍾意呢個location。」他補充,這位舊同學游說買樓,但單位是自己選擇。他稱:「買入後覺得有少少後悔嘅,因為你見到啲人喺九龍、新界,400幾萬,同等價值,但呎數大好多嘅單位,但始終位置方面係一個取捨。」至於3年後升定跌,哪有買家不怕蝕,「但係……自己都……嗯……本身揀港島,就係貪佢個價比九龍、新界硬少少咁多,就算樓價真係跌,咪繼續住住先,等到將來樓價升,先再打算。」

單位僅164方呎,「香港社會就係咁,就算我咁大個仔都未試過擁有自己一間房,一直都係同屋企人同一間房瞓,反而有自己物業係得着,有自己一個人空間……本身我都好宅,平日都係打吓機、睇吓netflix,長期要我留喺屋企都無問題。」被問鏡頭背後他女友介不介意這劏房?女友搶答:「你咪答我住東區。」繼而到他回應:「我覺得我女友完全唔介意,仲非常開心,佢係非常願意同我食麥記嘅女朋友。可能嗌交會多咗,到時要冷靜,咪落去3樓會所囉!」總結來說,劏房都是樓,「長線係換樓嘅踏腳石,儲吓錢,將來樓價升,可以換大少少咪換間一房。如果樓價跌,咪自住囉!」

164呎劏房水龍頭與插座僅距12吋 機電署建議盡量遠離

《蘋果驗樓》邀請資深驗樓師詹濟南驗收Charles買入的劏房。未上樓,已被大堂老鼠嚇窒。一眼睇晒的劏房,作為小型發展商首個私人住宅項目,瑕疵甩漏實屬預計之中,意想不到是廚房水龍頭與插座如此貼近,即有幾近?12吋,即約300毫米。驗樓15項工種有11項都要扣分,總分69分,其中玻璃問題竟牽涉中美兩國關係。

樓盤:筲箕灣One Eighty
單位:中層B室
實用面積:164方呎
成交價:394萬元
呎價:2.4萬元(係,仲貴過太古城)
設計
設計不列入驗樓計分項目,但多項設計令詹Sir不吐不快。大門旁入牆鞋櫃,窄到打平放一隻鞋都有困難。廁所洗手盆9吋乘13吋,猶如洗牙盆,但刷牙漱口要小心,因為舉頭容易中頭獎,後腦易頂到鏡櫃。最牙煙設計是開放式廚房牆身的插座,與鋅盆水龍頭相距只是12吋,水龍頭一擰,出水位近乎觸碰插座,詹Sir建議轉做防水型插座。
機電工程協會創辦人、註冊電業工程人員嚴志昌表示,根據機電工程署有關線路條例指出「插座安裝位置應盡量遠離水龍頭、燃氣開關或炊具,以免發生危險。」如果有人違反相關條例,機電工程署可以控告註冊電業承辦商或有關註冊電業工程人員。不過條例指「遠離」沒有具體數字,所以未能證實這個單位的情況有無違規。
記者將上述情況向機電工程署查詢,該署回覆,根據《電力(線路)規例工作守則》,廚房內的插座須由獨立電路供電及應以電流式漏電斷路器作保護,至於插座安裝的位置與其他廚房設備的距離並沒有特定要求,但應盡量遠離水龍頭、燃氣開關或炊具,以免發生危險。
窗(3分‧不及格)
問題:全屋兩扇窗11塊玻璃,當中5塊玻璃有花痕。詹Sir稱,睇玻璃花痕主要根據美國及中國標準,美國標準要求是距離1米觀察,允許每塊玻璃花痕不長過75毫米,如有不長過75毫米花痕,兩條之間距離需要多於600毫米。中國標準要求距離600毫米觀察,每條花痕不允許長過100毫米,而每平方米玻璃允許8條不多於100毫米的花痕。由於現場客廳一扇玻璃有2條花痕,長度少於100毫米,按中國標準是收貨,不過如按美國標準就不收貨,因為兩條花痕距離少於600毫米。那就要追問發展商按哪一國標準交貨,詹Sir稱:「我做起樓,我就一定會話跟中國標準囉!」
建議:業主可否要求發展商打磨玻璃?詹Sir說:「磨就不如唔好做,磨完隨時變哈哈鏡。而家花痕就唔會爆玻璃,最擔心係有焊屎,有焊屎會爆玻璃。」
門(7分‧及格)
問題:業主收樓時發覺大門閂唔埋,其後又無端端閂得埋。到詹sir驗完,發覺大門門鉸螺絲不貼。
建議:簡單,扭返實螺絲。
鋪磚(6分‧及格)
問題:浴室瓷磚崩花,磚縫夾口有窿,但未至如上次大嶼山意堤那個單位廁所瓷磚的掃口粉一篤就散。
建議:重新出發?唔使啦,情況唔算嚴重,可以修補嘅。
整潔(0分)
問題:浴室假天花收埋一個平時用來袋企身垃圾桶的黑色垃圾袋,詹Sir話:「有啲嘢係要徹底解決,唔係留低手尾畀人搞。」
建議:不用了,詹Sir出手清走了。
評分:69分
15項工種有11項都扣分,項目承建商都算有少少品質監控,否則與其他初試啼聲的發展商一樣,不及格。發展商回應,目前法例列明電掣與水龍頭需保持距離,而沒有規定距離具體數值,安裝有關裝置亦獲相關註冊認可人士核准。至於單位瑕疵方面,有問題的5塊玻璃,當中4塊會打磨、1塊會更換,將陸續安排,大門及浴室掃口位均已完成執修。
採訪:陳家雄、張嘉鎣
編撰、旁白:張嘉鎣
攝影:Wyman
剪接、後期:劉果豐
編審:楊智佳