政圈中人皆知，工聯會立法會議員麥美娟Alice好錫佢一對「寶貝女」。係呀，佢係未婚媽媽嚟㗎，成日帶住一對囡囡、即係狗仔麥糖同麥棗四圍去。最近寶貝女仲上鏡，做埋Alice宣傳短片嘅主角，唔通想捧佢哋做狗明星？

拍片關注醫療美容風險

Alice話係咁啱得咁蹺箒，因為拍片當日屋企冇人湊阿女，咪帶埋佢哋去拍攝現場，爆料話同片另一主角、工聯會小花劉桂容換衫後見自己凸咗個肚腩仔出嚟，想搵嘢遮住，情商Alice嘅寶貝女上鏡坐喺大髀上，估唔到麥糖同麥棗冇扭計，乖乖哋坐定定一take過冇NG，出到嚟仲好搶鏡㖭！
非常關注醫療美容事故嘅Alice話，想藉住同兩位小花（另一位係陳穎欣）拍嘅短片宣傳「要靚又要命」，叫姊妹們扮靚之餘，都要關注醫療美容嘅風險，因為健康先係無價寶。睇片可到： https://www.facebook.com/512901462180543/videos/734712086666145/