近排馬房部門肯定好忙，事關有唔少馬退役、轉廐，而游走於沙田馬場及上水雙魚河之間的賽駒亦有唔少。
最新就有五駒放完草，返番住開的沙田競賽馬房，分別為東廐「風火勁駒」、姚廐「銀禧繽紛」、蔡廐「主力艦」、沈廐「眼光獨到」及賢廐「馬飛龍」。當中只有「馬飛龍」贏過馬，其餘均無上名紀錄，甚至直頭未跑過。
「主力艦」與上季打吡冠軍「戰利品」同主，「戰利品」5月大敗後，因心律不正常、心肌酵素增加及左後腿脛部蜂窩織炎，至今仍未復出，而「主力艦」上個月左後腿脛骨應力性骨裂，要唞番夠至可以再操過，幕後當然希望佢往後可以健健康康，從而正常地出賽爭成績。
至於「風火勁駒」係證券界女強人衛淑莊手上暫時唯一子彈，告東尼當然會落足心機炮製，以回饋呢位長情馬主支持。