港華燃氣（1083）喺五年殘價，得8倍預測PE，110億元市值，而繼基金大孖沙澳洲聯邦銀行之後，連大股東煤氣（003）都出手增持，跟大孖沙齊齊煲港華。
澳聯銀喺上年中揸港華5%權益曝光，之後keep住增持，兼由當時1.38億股，去到今年頭總共2.13億股或8%，最貴一板講緊7.13元，港華現價4.14元，潛水40%樓上。
啱啱上周，港華阿媽煤氣亦落場增持港華，成本價同港華現價，又係差無幾。
港華上年唔計嚟自人仔滙兌虧損，同焦炭廠撥備，實際盈利12億元，增長1%，喺咁嘅時勢下，仲keep到盈利，已經好靚仔。場內專業評估，港華今年EPS 0.48元，兼由家陣13倍PE，調整到預測8.6倍PE，比本身過去5年平均18.4倍PE，同10年平均22倍PE，平咗50%樓上！
場內內地燃氣瓣數，中燃（384）同華潤燃氣（1193）今年預測14倍PE、昆侖（135）12.4倍、新奧（2688）11.7倍，中裕（3633）9.4倍，呢班行家平均12倍PE，港華PE又平霸。