上次講到敏妮嘅健身教練，資金唔多想學投資，希望有人畀啲意見。其實啱啱出嚟做嘢嘅年輕人，都有類似問題，就係資金唔多，但想投資。敏妮提議教練月供股票，因為敏妮亦是由積少成多開始自己的理財投資。
前排一班同事開會，有位啱啱入職嘅同事問敏妮，「我雖然啱啱出嚟做嘢，都好想有一日可以自己買層樓，但敏妮你都知我幾錢人工，都唔知儲到幾時先夠首期？」敏妮上司聽到之後，有感而發話，自己啱啱出嚟做嘢時，起薪點同家陣嘅後生仔差唔多，但係佢後生時嘅樓價，同家陣就好大分別，家陣後生仔想買樓，除非屋企人幫手，否則單靠自己能力，都幾吃力。
敏妮同意有屋企人幫好重要，但自己都要有基本嘅本錢。敏妮啱啱出嚟做嘢嗰陣，已故嘅外公同敏妮講，「敏妮，呢個世界要『錢』搵『錢』，先至可以將財富滾大，你要致富，就要捱到第一嚿本錢，之後就用呢嚿本嚟投資。」敏妮好記得外公嘅說話，但份糧得雞碎咁多，點樣先搵到第一嚿本錢呢？好彩當時利率冇家陣咁低，加上雖然未識投資，但識得點慳點儲錢，所以啱啱出嚟做嘢時，用零存整付嘅方式，用咗幾年時間，儲咗人生第一個10萬蚊。