郭晉安（安仔）、周勵淇（Niki）、林文龍、袁偉豪和陳自瑤（Yoyo）等，今日出席劇集《再創世紀》宣傳活動，適逢郭晉安於10月9日生日，大會推出蛋糕送驚喜，眾人預祝佢生日。

郭晉安今次首度同周勵淇合作，講到呢位對手，安仔笑指Niki係「問題少女」，每日開工幾乎有100條問題，正因為咁反而令佢哋好快就熟落。Niki 就話好喜歡同安仔傾談，覺得佢係個有經歷嘅人，之前喺布拉格拍攝時，仲成日傾人生。至於戲入面嘅安仔，對投資有一手，Niki就大曝安仔現實中都有好多間物業，安仔即反擊話：「我十間屋都唔夠Niki一間屋咁貴啦。」

而周勵淇自曝，早前喺街上遇到影帝梁家輝，佢話得知家輝哥都有追呢套劇，還追問佢之後嘅劇情，仲獲影帝讚賞，令佢非常開心。至於早前入院嘅袁偉豪，個樣都幾攰下，左眼仲爆埋微絲血管，之前拍《鐵探》夾爆咗手指公，依家仲係好瘀黑，連佢自己都話今年健康的確麻麻地。

另外，陳自瑤好意外套劇播出後，收到唔少訊息，觀眾竟然對佢劇中嘅唇膏好有興趣， Yoyo笑言等播完後，會話畀大家知。提到早前同囡囡外遊？Yoyo話自己就快要開新劇，所以趁有時間帶囡囡去見識下。問到老公王浩信點解冇同行？Yoyo話老公要拍劇，好難夾啱大家時間，個女都好體諒冇投訴。

精選娛聞，喺晒《娛果》
http://fb.com/appledailyent