向來言論出位嘅民建聯立法會議員「元秋」蔣麗芸，今日喺立法會公務員及資助機構員工事務委員會會議傾到公務員培訓問題時，又有唔少搞笑言論，包括要求將政府稍後開幕嘅公務員學院，選址喺大嶼山同離島，話咁樣可以確保公務員有一個環境好啲、地方大啲地方學習喎。

聽到呢個建議，公務事務局局長羅智光都忍唔住笑，回應時就話如果安排學院喺咁遠嘅地方，對同事上堂同返工都有困難，所以目前搵嘅地方都係集中喺巿中心交通方便嘅地方。元秋聽完好不滿，質問羅智光：「大嶼交通方便吖！知唔知每日幾多巿民喺大嶼山出嚟返工？」

元秋之後又發表偉論，話自己對好多政府新招聘或者現任公務員係咪熟悉基本法有好大疑問，話自己同啲高級公務員交流過，發覺佢哋對「基本法大精神」唔太清楚，問羅智光係咪有啲公務員從未返過大陸？羅智光聽到咁騎呢問題又再笑咗，話政府有成18萬公務員，有人未去過大陸唔出奇呀。

元秋聽後不滿追問，局長有無公務員返大陸的數字，又問局方有無鼓勵公務員要返大陸？羅智光就話無一個公務員返大陸嘅具體數字，強調政府並無限制公務返大陸。元秋聽完繼續唔收貨，問羅智光可唔可以為公務員進行不記名調查，問吓18萬公務員返過大陸、有無回鄉證、以及識唔識國歌，仲話今日原本諗住即場考羅智光、公務員事務局常任秘書長周達明同公務員事務局副秘書長陳瑞緯識唔識唱國歌，但由於發問時間已夠，元秋就話：「我今次唔考，下次先考你哋（唱國歌）！」，令到羅智光唔知好嬲定好笑。