台灣「第51屆電視金鐘獎」今晚喺國父紀念館舉行，紅地毯雨中舉行，由吳宗憲帶住女兒Sandy率先現身，吳宗憲仲幫個女整理晚禮服，免得佢走光。其中行上紅地毯嘅仲有吳宗憲同女兒Sandy、型男邱澤、陳楚河、女星柯佳嬿等，仲有已拆夥多年嘅5566，而韓國型男、《Running Man》嘅金鐘國都有份擔任頒獎嘉賓。

金鐘國一現身，即獲大批fans報以瘋狂嘅尖叫聲，佢獨自行紅地毯，邊行邊揮手，非常友善，當佢行近兩旁接近fans時，有人乘機拋出禮物畀佢，雖然跌咗落地，但金鐘國都一樣彎身執起，仲做手勢多謝fans。

之後佢接受紅地毯主持人納豆訪問時，先以中文自我介紹，再用英文致謝。其後佢被問到可以同台灣知名主持人胡瓜一齊做頒獎嘉賓，佢透過繙譯人員表示，曾經同胡瓜見過幾次，對於可以同咁有份量嘅主持人合作，係佢嘅榮幸。之後佢又應主持人要求，清唱周杰倫嘅《聽見下雨的聲音》，佢仲問fans介唔介意佢睇住歌詞嚟唱，之後佢就拿出手機，對住嚟唱，發音好標準。