內地電器業一向競爭激烈，單係連鎖集團國美電器（493）同蘇寧電器，為爭行內一哥寶座，一直打生打死。胡潤中國富豪榜嘅首富國美主席黃光裕雄心萬丈，高峯期喺全國嘅分店數目去到800幾間，多過蘇寧近百間。不過呢個競賽難再玩落去，經歷金融海嘯嘅衝擊後，之前只會向前衝嘅國美，終於要減慢步伐，佢哋高層話，「係喺最恰當嘅時候做最正確嘅事」。
據《中國經營報》指，之前幾年只會提「擴張」嘅國美，執董兼總裁陳曉竟然話，下年開店計劃要審慎同保守，而下年嘅資本開支都會削減。開口埋口都係「審慎」、「保守」同「削減」，呢類消極字眼，佢哋係第一次用。
咁都冇計，市場傳黃光裕手頭資金緊張，要錢周轉，搞到市場出現恐慌性拋售，加上新鴻基金融集團將國美評級為「沽售」，國美嘅股價今個月2號起連跌6日，由2.25蚊跌至1.15蚊，足足唔見咗一半咁滯，噚日都係得1.28蚊……國美呢輪嘅運氣似乎差咗啲噃。
本嚟股價大跌加上前景難料，減慢速度無可厚非，之不過，國美有個亦步亦趨嘅對手蘇寧電器跟住，報道話，國美一減速，好易就會俾對手有機可乘，報道訪問咗蘇寧總裁孫為民，佢好老實咁話：「如果真係咁（國美發展減速），可能降低蘇寧嘅競爭成本。」

你行慢啲我都慳啲

孫為民仲話：「外行睇熱鬧，內行睇門道。實際上國美放緩開店速度，都同佢哋間公司結構有關。」佢話，國美先吞永樂，再買大中，又收購中關村同三聯商社，擴大戰線，呢啲企業過去各自為政，即使整合咗，都會有啲重叠。商場好現實，敵進我進，敵退我更要進。家陣國美氣勢一差，對手仲唔食住上咩！

李華華
mailto:[email protected]