浙江省同鄉會聯合會今朝早就舉行學生交流活動嘅揭幕儀式，署理特首張建宗、前全國人大常委范徐麗泰、民政事務局副局長陳積志都係坐上客，除咗港府高官，出席嘅亦都有浙江省委常委、統戰部部長熊建平。

依啲活動嘅一大特色就係大批嘉賓致詞，咪話台下學生會瞌眼瞓，就連台上主禮嘅范太都難忍睡魔急Call，先係「閉目養神」，到最後都係「釣魚」瞌眼瞓。好在成個典禮只係歷時半個鐘，影埋大合照范太就可以離開抖抖喇。

講返成個典禮，曾經用普通話發言而被嘲嘅張建宗無負責致詞，只係負責頒授錦旗，反而陳積志就需要發言。八方就發現原來陳積志同張宗一樣普通話都非常普通，「四月」就講成「西月」，「基本法」又講成「雞本法」等，仲有一大部分八方真係翻譯不能，睇嚟唔少問責官員嘅普通話都有待改善喎！