鄧紫棋（G.E.M.）於湖南衛視歌唱節目《我是歌手2》三奪冠軍，可惜喺今晚將播出嘅第七期比賽，G.E.M.選唱莫文蔚《如果沒有你》出戰，仲唱到真情流露喊咗出嚟，但卻未能再摘冠，據知今集佢仲係跌出三甲，得第四，冠軍係選唱《愛的箴言》嘅內地歌手韓磊。

參加得呢個比賽，自然想贏。雖然之前已有傳聞，話湖南衛視根本只係整一場大龍鳳，到最後都係捧番自己友，港台兩地歌手唱得點好，最後摘冠可能都只係內地歌手。上屆賽果已是活生生的例子。不過今次G.E.M.個勢咁勁，而且三度摘冠，仲吸納咗千千萬萬個強國fans。要贏，亦唔係冇機會。G.E.M.都對自己有好大期望。噚日錄影第八期比賽之前，佢仲貼咗張抽出場序嘅相，話:「哈哈哈，我又抽到這個出場號碼.........」雖然G.E.M.用手遮住號碼，據知佢噚晚係打頭陣出場，獻唱ChristinaAguilera嘅《LadyMarmalade》，仲有四個dancers。

相中G.E.M.好開心，唔知係咪因為抽到個luckyno.喇。喺第四期作賽，G.E.M.首先出場，佢揀咗范曉萱首《我要我們在一起》自彈自唱，最終再冧莊勇奪第一位。

打頭陣出場係好事，之但係，今早七點，G.E.M.忽然於微博爆seed，寫道:「當你看到人一次又一次又一次重覆（複）犯著同一個錯誤，你還會選擇一次又一次又一次地接受，堅持，忍耐並且原諒？對於未來會如何，我永遠不會預料的到哪一種決定最好，最不會後悔。我只知道，在我22歲的這一年，我還做不到。」

拿拿拿，之前喺第六期選唱Beyond嘅廣東歌《喜歡你》出戰，臨時因為耳機失靈，音樂又出現問題，於是G.E.M.唱唱吓嗌停，結果雖然摘冠，但引來軒然巨波。而且《我是歌手2》錄影期間已非首次出現問題，早就為人垢病。依家G.E.M.晨早流流咁激動，唔通噚晚又出事？呢集28號就有得睇喇。