次次睇上市公司年報，大家其實最鍾意睇啲高層究竟幾多錢人工，係咪物有所值，八卦之餘順便睇埋邊個係打工皇帝。今年嚟講，由於和黃（013）年報仲未出，所以唔知已經幾多連冠、年薪過億嘅霍建寧大班可唔可以繼續「冧莊」。咁暫時邊個係最高人工「新人王」呢？已經唔係陳振聰軍師、宏霸（802）主席朱偉民（3283萬元年薪），而係利福國際（1212）主席、人稱「細劉」嘅劉鑾鴻！

爬陳振聰軍師頭

利福年報顯示，細劉年薪總額由07年嘅1424.9萬，跳升到舊年6397.8萬銀；睇真啲，佢底薪398.8萬其實冇變，係公司以股份作為薪酬嘅部份大增，由前年1024.9萬加到舊年5997.8萬。至於係咩原因令細劉加人工加到咁勁就無交代。值唔值呢個價，睇嚟要利福小股東評價嘞。
講番霍大班，話時話，若果（若果咋！）超人因為唔likey3G搞到家仲未真正止血，又或者因為金融海嘯要縮皮，又或者業績倒退（啲分析員講咋！）而要減霍大班人工，話唔定一個唔覺意，佢份糧可能同細劉哥睇齊……睇嚟舊年董事人工冠軍，可能有得爭噃。

李華華
mailto:[email protected]