兩位助理署長級官員被邀請退休，因禍得福，將啲退休金六百幾萬元買晒按揭證券公司五年債券，年息四點七五厘，每月可得二萬六，再加上長俸三萬幾蚊一個月，無驚無險就月入六萬餘。既然佢哋做咗二十幾三十年，相信有一大筆積蓄，以今日嘅樓價，大可買番一間千零呎舊樓，以後食住無憂。
呢啲是否真係庸官呢？高官A對左丁山講：「未必一定，太叻冇人敢要嘅官，都可能會如此收場，尤其係英國人，唔識中文，要做副署長、副局長級嘅，難度好大，如果佢嘅資歷及經驗更好過局長、署長，真係無處（署）容身㗎，只好與所謂庸官一起退休囉。其實要被定性為所謂庸官，亦非常不易，冇番十年八年表現普通嘅紀錄，都冇資格，即使我好羨慕嗰兩位仁兄嘅退休補償，自今日開始躺死不幹，自甘平庸，亦要捱多十年八年至得，好辛苦啫！」
左丁山聽咗，幾乎笑到噴飯，痛惜自己昔日點解考唔到公務員嘅金飯碗，亦惆悵自己老婆點解唔去打政府工，以補左丁山之不足，否則嘅話，今日立即可以自甘平庸，他他條條咁過活，唔使日日俾編輯追稿啦。有層樓、唔使做，月入六萬幾，日日讀林山木啲閒書，都唔知幾歎，心實嚮往之。不過年輕人千祈唔好以此為榜樣噃，阿松搞教改嗰陣，叫我哋不甘平庸㗎。