麥長青、江美儀同單立文今日去到北角新光戲院，出席舞台劇《羅生門》記者會，舞台劇嚟緊1月演出，麥包話第一日開會已經覺得興奮+緊張+擔心同驚。

麥包話：「我哋演喜劇信心會大啲，對於我哋三個，第一次做咁靜同正規嘅劇。」講到今次嘅角色，麥包就話有大考驗：「今次我要強姦美儀，考驗係我未試過強姦人，對於豹哥嘅考驗係佢未試過唔強姦人。」

其實喺25年前單立文曾經演過《羅生門》電影版《呀嬰》，戲入面仲飾演強姦王祖賢嘅角色，豹哥就笑言話今次要反過嚟要指導麥包。

講到羅生門，三位主角話：「羅生門呢排好hit，佢嘅意思大家又知唔知？佢係小說出嚟，原裝正版嘅羅生門，係講各自有自己嘅版本，邊個講真都冇人知，揭露人性嘅醜惡點。」麥包仲話放喺現實社會比比皆是，豹哥就即刻搞笑咁問：「咁放喺電視台上呢？」三個即時大笑，麥包話：「緊係啦，擺明就係戲劇嚟。」

咁對於最近陳國邦離巢風波，麥包話：「冇啦，正常。」但講到佢哋份約，麥包就話明年年尾就滿，依家仲未諗住，美儀就話自己仲有好多年，依家言之過早，豹哥就話：「唔好講住，我啱啱先簽咗新約。」