坊間流傳已久，話男人如果再婚，最好娶個年齡細自己一半再加七歲嘅女人。即係如果男人50歲，就娶個32歲嘅女士；如果好似隔籬孫兄年年25歲就年年娶個20歲嘅少艾，如此類推。N÷2+7呢條公式，利世民聽過唔只一次，但係相信會係今日中環人最熱門嘅題目。
話說噚日長和系公布業績，大家嘅焦點唔係李生今年賺幾多，亦唔係3有幾大鑊，更加唔係李家第三代有冇男孫，而係超人一句平常話︰「我唔排除再結婚嘅可能性」！呢句話如果由一個同樣德高嘅賭王何生講，最多值娛樂頭版。但係由超人講，呢個說話絕對可以上《福布斯》，𠵱家我哋講緊全球十大首富續弦，真係唔講得笑！利世民屈指一算，超人1928年出世，行年78歲，我唔知佢有冇機會見到民主，又或者有冇興趣見到民主，不過從佢嘅精神嚟睇，一定有心有力面對第二春！

巨型王國新變數

本來人家私事，多講無謂。不過長和系業務實在太過廣泛，有邊個香港人可以有一日唔幫襯佢？再加上超人對政治同社會唔同層面嘅影響力，又點可以唔關心究竟邊個會做超人太太？利世民再屈指一算。咦？78歲除2加7，等於46歲，咪差唔多係超人紅顏周Dot-com嘅年紀？！再翻查紀錄，周女士1961年7月出世，行年45歲多啲。睇嚟N÷2+7呢條公式都幾準！超人講嘢一向算過度過，好少亂嚟。好似噚日有人問佢有冇好書推介，佢都耍手擰頭唔講，但係人生大事就咁大口，認真耐人尋味。
其實呢件事唔好話對長和系未來冇影響。首先大家都一早認定小超會接手呢個巨型王國，如今有新變數，究竟係唔係呢？你問我，我問邊個？
利世民