廸士尼動畫《羅拔神奇家族》前晚於JP銅鑼灣戲院舉行首映禮，出席藝人包括葛民輝、SunBoy'z及唐寧，而甄子丹、黎燕珊和麥包分別帶同子女到場。
SunBoy'z在台上表示有份唱片尾曲，阿葛聞言即奚落一番說：「片尾曲呀，即係掃爆谷時（指觀眾全都離開後）播㗎！」SunBoy'z反駁說：「唔係，係觀眾起身嘅時候播。」
事後問阿葛可擔心SunBoy'z嬲怒時，他笑說：「唔會，我同佢哋好熟，我拍戲都做過Steven老竇，其實𠵱家好難得有片尾曲，因為啲電影通常好趕，唔會有片尾曲。」SunBoy'z則表示不會感到尷尬和不開心。

吊威吔男人最痛

此外，SunBoy'z昨日在西九龍中心舉行新碟簽唱會，為搞新意思，三人由商場5樓吊威吔為巨型海報簽名留念，完成高難度的簽名儀式後，Steven說：「我哋三個都手震，我本身有畏高，惟有死頂。」Dennis則說：「吊威吔嘅裝備好緊身，勒得好痛，真係男人最痛。」
採訪：卓美娟　攝影：陳慧安