各位讀者，聖誕快樂。相信大家今日最hot嘅話題係睇咗《功夫》未。好老實講，我睇咗，重係一個星期前睇咗。所以過去一個星期真係好難過，因為身邊同事朋友都忍唔住成日想問我關於《功夫》嘅所有嘢。通常問題都係離唔開兩個：「好唔好睇？」「好唔好笑？」我當然係笑而不語啦，呢個係我一向做人嘅態度。最多都係加多句：「你睇吓咪知囉！」不過今日真係忍唔住要同大家講：「《功夫》真係好好睇。」論製作，國際級Aclass，論創作，國際級AAclass。我唔係收咗阿周生錢，又或者礙於佢嘅淫威下作出以上結論。事實係我根本覺得呢一世都冇可能同佢合作，因為佢好清楚話畀大家聽：「佢係一個真正嘅導演。」佢就係想拍一部功夫片。

想拍一部功夫片有乜咁特別？我哋港產片近十年拍咗好多啦！大部份都係打嚟打去，唔知想點。古裝民初都冇乜所謂，但係時裝片我就真係解釋唔到，我成日都會問自己：「點解啲人會咁好打？」引伸落去會開始研究角色歷史背景：「佢哋到底喺邊度學得咁好打？招式上係咪互相配合過呢？」本人由小學三年級參與過幾次打鬥開始，到現在三十幾歲目睹過多次打鬥為止。絕大部份所見所聞都係三個字：「亂咁打」，有招式嘅對打真係聞所未聞，見所未見。我成日都幻想如果有一日我要同人打架，第一招一定係嚟一嘢撩陰腿。呢個就係我對功夫嘅定義。所以當周星馳實實在在去拍一部有關「功夫」嘅電影，我知道真係好難。因為「功夫」係一個國粹，台灣有李安導演示範過，中國有張藝謀示範過，希望周星馳可以示範多一次。