查實狼班子已經上任咗近兩年啦，知名度點解仲咁低？好似律政司司長袁國強咁吖，舊年年底開始拍住林鄭月娥同譚志源組政改三人組，落區見人樣樣做齊，見報率都唔少㗎，但政府總部嘅保安，竟然仲唔知佢係乜水？

話說袁國強今日晏晝行去政府總部東座，準備同廠商會及學者會面談政改；點知行到東座入口，現場保安同佢講咗句：「有咩幫到你？」之後，要求袁國強攞個證嚟睇。雖然袁國強笑笑口唔介意，但據聞呢位不知道袁國強是誰嘅保安，最後被當場嘅保安阿頭鬧到狗血淋頭。睇怕袁國強係時候提升知名度咯。