現年80歲嘅資深演員申星一，活躍於六七十年代，曾拍攝多部電影作品，亦曾多次於「百想藝術大賞」、「大鐘獎」或電影節獲獎，不過最近作品已數2013年嘅韓片《夜關門：欲望之花》。而韓國方面今日傳出壞消息，指申星一患上第三期肺癌。

據《東亞日報》報道指申星一因嚴重咳嗽，前日到首爾某綜合病院進行肺組織檢驗，發現患上第三期肺癌。醫院方面立即為申星一進行放射性治療及抗癌治療，會視乎治療效果先考慮會否進行手術。而申星一噚日開始進行放射性治療，目前都要於醫院留醫。

據悉申星一太太對申星一患癌一事大受打擊，事關申星一早於1982年已經戒煙，並搬到鄉村地方、空氣好嘅地方生活，不過太太亦表示透露申星一對病情好樂觀，並冇因為患上癌症而自暴自棄。

患癌消息一出後有唔少媒體聯絡申星一，不過申星一亦大方受訪，表示其實自己上月30號已經開始接受抗癌治療，所以由第三期肺癌變好成第二期肺癌，而且亦施咗手術，情況已有好轉。而申星一坦言預計要用1年時間同癌細胞打仗，獲大批網民及粉絲留言加油打氣。