好緊張!其實《衝上雲霄II》一眾演員、監製及編審比大家更緊張——瞙睽違十年，究竟《衝上II》，對唔對路呢？周六晚有睇過製作特輯嘅網民就不敢寄予厚望——咁其實，可能又真係太快下判斷嘅。製作特輯拍得凌散、花絮行先片段極少，可能只係製作團隊唔想出現咁多「劇透」而已。

不過無綫呢個保密功夫，就出現漏洞。之後一條用嚟賣埠嘅三分幾鐘預告片被擺上網，大把網民已先睹為快；今早仲有一條長逾兩分幾鐘、來自大馬Astro華麗台(即大馬Astro同TVBI合作開辦嘅娛樂頻道)嘅《衝上2》片段，唔係花絮喇，而係實實在在嘅劇集率先睇。

片段一開始，就係剛歷喪妻(蘇怡、胡杏兒飾)之痛嘅Sam哥吳鎮宇，一個人喺外地某間朱古力店，想起Zoe(蘇怡)。當日仲係Zoe主動追求Sam哥嗰陣，Zoe曾要求對方許諾、以後飛到世界上每一個地方，都要買一粒朱古力俾佢。而喺Sam哥嘅回憶片段裡，就有Vincent——馬德鐘陪佢一齊買朱古力。無奈，劇中Vincent同Zoe都已不在人世。

之後鏡頭一轉，已躍身成為吳卓羲嘅高級副機長，夜麻麻見到大嫂Zoe……當然嗰個唔係Zoe，而係飛機維修員顧夏晨(胡杏兒分飾)，於是摸上客機望清楚，又見唔到人。直至翌日(應該係)，日頭白白之下再到顧夏晨，吳卓羲先知自己認錯人。

之前已經講過，喪妻後嘅Sam哥，一直不願重返工作崗位，反而走咗去幫米雪、留喺英國開餐館做整餅師傅。後來終於肯收拾心情、重新出發喇，畫面交代佢喺鏡前整裝待發之際，忽然想起Zoe…幻想/回憶Zoe同佢講:「你放咗好耐假0架喇，CaptainTong，著住套制服、型到爆，精神翼翼咁嘅樣。然後飛上天，話俾我知彩虹嘅盡頭係乜嘢。」

至於鄧梓峰，上一輯同Sam哥同一級數，依家高級過Sam哥喇……同馬國明(Roy)「有性冇愛」嘅江美儀亦都出咗場喇……