圈中人緣甚佳的尹志強日前因鼻咽癌引發身體機能衰退悄然離世，友人紛表惋惜，他的女友米雪卻收拾傷痛，前晚和昨日冒寒趕拍無綫劇集《女人最痛》，同劇演員馬德鐘、滕麗名、陳國邦和江美儀異口同聲力撐米雪處事夠堅強，是值得後輩學習的榜樣。

狀態一樣Fit

滕麗名形容昨日開工時台前幕後額外體諒米雪，滕麗名說：「我感受到人間有情，監製全程親力親為貼身照顧米雪姐，我哋大家都好support佢，米雪姐真係好有經驗，佢反而怕影響全個劇組。」滕麗名指拍外景時，吸引不少巿民圍觀，大家都支持米雪。
馬德鐘一連兩日跟米雪開工，他接受電話訪問時直指米雪表現如常，並說：「米雪狀態同平時一樣咁fit，佢可以返嚟開工，都係想專注番工作，大家同事又好合拍，開工期間好順利。」
江美儀跟米雪昨日拍一場爭拗戲，江美儀形容米雪全程都沒帶私人感情開工，埋位便可投入拍攝，她昨日說：「開工前仍同大家對稿，好專業，我哋明白佢唔請假係唔想影響其他同事，佢呢個態度好專業。」
此外，陳國邦非常佩服米雪，他昨日說：「噚晚佢返嚟開廠，一入嚟就同大家講多謝支持，話件事令同事擔心。佢參與拍攝同平時一樣，呢份精神好令我好敬佩。大家冇特別提件事，只係眼神送上祝福，我相信米雪姐可以控制自己情緒，佢對人生變遷起落，對事情嘅應變，係長時間鍛煉返嚟。」
採訪：比華利
攝影：楊浩賢、李志明、彭琮然