在英國修讀頭髮護理三年的Amy說,頭油從髮根排出,洗頭時應清洗髮根,但添加護髮素時,則應塗在頭髮上,以鎖緊水份,「如果搽晒喺髮根,會塞住毛孔,仲多油。」她又說,在家將焗油塗上後,可用保鮮紙包裹頭部,但時間不可較指示的長,以免太油膩;染髮後可用專業品牌如Schwarzkopf的護髮用品,補充養份。
她說有客人會要求模仿藝人髮型,但藝人常有髮型師在旁整理頭髮,「真係剪舒淇個髮型返工,半日就亂晒。」一位臉圓少女曾堅持模仿容祖兒髮型,結果「齊陰」令她的臉看來更圓,最後更哭了起來。
Amy說臉圓的人可用頭髮輕遮兩頰,臉部太尖的要露出臉龐,以免「只見頭髮,見唔到個樣。」若頭髮太疏,她建議剪短,因頭髮豎起會看似厚一點;太濃密的可留長再「偷薄」,「但如果個客要剪唔啱佢嘅髮型,我會勸三次,唔聽就算;因為最緊要係佢自己鍾意。」
記者:翁煜雄
逢周一刊出